नांदेड ( शालेय वृत्तसेवा ) :
राज्यभरात 14 ते 28 जानेवारी हा मराठी भाषा संवर्धन पंधरवडा म्हणून साजरा केला जात आहे. त्यानिमित्ताने नांदेड वाघाळा शहर महानगरपालिका प्राथमिक व माध्यमिक शाळा जंगमवाडी येथे दिनांक 27 जानेवारी 2025 रोजी मनपा शिक्षणअधिकारी मा. व्यंकटेश चौधरी यांच्या मार्गदर्शनाखाली लेखक आपल्या भेटीला या कार्यक्रमाचे आयोजन करण्यात आले होते.
शाळेचे मुख्याध्यापक मा.साईनाथ चिद्रावर सर कार्यक्रमाच्या अध्यक्षस्थानी होते तसेच प्रा. केशव इंगोले , प्राचार्य बीएड कॉलेज लोहा हे प्रमुख पाहुणे म्हणून उपस्थित होते. यानिमित्ताने कवी व साहित्यिक प्रा. सदाशिव जोशी , प्रसिद्ध साहित्यिक मा.बालिका बरगळ, कवी व गायक मा. क्रांतीकुमार पंडित नवोदित कवयित्री माननीय दिपाली त्रिभुवन नवोदित कवयित्री माननीय वैशाली वागरे- बुक्तरे यांना आमंत्रित करण्यात आले होते. याप्रसंगी उपस्थित लेखकांनी विद्यार्थ्यांना मराठी भाषा संवर्धनाचे महत्त्व सांगितले तसेच मराठी भाषेवर आधारित, शालेय जीवनावर आधारित स्वरचित कवितांचे सादरीकरण केले.
मान्यवरांच्या हस्ते मराठी भाषा पंधरवाडा निमित्य तसेच प्रजासत्ताक दिनानिमित्त घेण्यात आलेल्या विविध स्पर्धेतील विजयी स्पर्धकांना बक्षीस वितरण करण्यात आले . लेखक आपल्या भेटीला कार्यक्रमाचा आस्वाद घेण्यासाठी विद्यार्थ्यांबरोबरच पालकांनी देखील हजेरी लावली होती. कवी व गायक माननीय क्रांती कुमार पंडित यांच्या गायनाने उपस्थितांना मंत्रमुग्ध केले. कार्यक्रमाच्या शेवटी सुप्रसिद्ध साहित्यिक माननीय बालिका बरगळ मॅडम यांची प्रकट मुलाखत नवोदित कवयित्री माननीय वैशाली वागरे- बुक्तरे मॅडम यांनी घेतली. या मुलाखतीमध्ये बालिका बरगळ यांनी त्यांचा शालेय जीवनापासून ते आज पर्यंतच्या साहित्यिक जीवनाचा प्रवास उलगडला. विद्यार्थ्यांना कोणते साहित्य वाचावे याबाबत मार्गदर्शन केले.
कार्यक्रमाचे सूत्रसंचालन शाळेतील ज्येष्ठ शिक्षक कामाजी गाडीवर सर यांनी केले. आभार प्रदर्शन श्री चिद्रावार सर यांनी केले. या कार्यक्रमाच्या यशस्वीतेसाठी माध्यमिक चे मुख्याध्यापक मा. रामराव साबळे सर यांनी विशेष परिश्रम घेतले. त्यांना मा.अनिल कामठीकर सर यांनी सहकार्य केले तसेच शाळेतील प्राथमिक व माध्यमिकच्या शिक्षिका रुपा झळके , शिल्पा जोशी ,ज्योती ढोणे , स्मिता जोशी व बीएड कॉलेज लोहा येथील छात्रअध्यापक व छात्र अध्यापिका यांच्या सर्वांच्या सहकार्याने हा कार्यक्रम यशस्वीरित्या पार पडला.
आपल्या प्रतिक्रिया आमच्यासाठी महत्त्वपूर्ण आहेत .