पुणे ( शालेय वृत्तसेवा ) :
नांदेड जिल्ह्यातील अर्धापूर येथील गटशिक्षणाधिकारी तथा साहित्यिक, कवी व्यंकटेश चौधरी यांना दुबई येथे 'लाईफ टाईम अचिव्हमेंट अवार्ड' देऊन नुकतेच गौरविण्यात आले.
महाराष्ट्रातील विविध क्षेत्रात काम करणाऱ्या नामवंत व्यक्तींच्या कार्याची दखल घेऊन पुण्यातील स्वयंदीप फौंडेशन व दुबई येथील काही संघटनाच्यावतीने दुबई येथे दरवर्षी लाईफ टाईम अचिव्हमेंट अवार्ड पुरस्कार सोहळ्याचे आयोजन करण्यात येते. व राज्यातील विविध मान्यवरांना हा पुरस्कार देऊन सन्मानित करण्यात येते.
अर्धापूर येथे सध्या गटशिक्षणाधिकारी पदावर असलेले श्री व्यंकटेश चौधरी हे एक उपक्रमशील अधिकारी म्हणून राज्यभर परिचित असून, शिक्षक आणि विद्यार्थ्यांना प्रेरणा देणारे विविध उपक्रम ते सातत्याने राबवीत असतात. बालसभा या त्यांच्या उपक्रमाची दखल घेऊन शिक्षणाधिकारी डॉ सविता बिरगे यांनी जिल्हाभरातील शाळेत बालसभा घेण्यासाठी नुकतेच पत्र काढले होते. जिल्हा परिषदेच्या शाळांमध्ये गुणवत्ता वाढीसाठी शिक्षकांना प्रोत्साहन मिळावे यासाठी ते सातत्याने शिक्षक भूषण पुरस्कार, विविध उपक्रमांची दखल घेऊन सन्मानपत्र, अभिनंदन पत्र देऊन शिक्षकांना प्रोत्साहन देत असतात. शिक्षण क्षेत्रातील त्यांच्या योगदानाबद्दल हा पुरस्कार देऊन त्यांना गौरविण्यात आले.
गेल्या चार वर्षांपासून पुण्यातील अधिकारी डॉ. बबन जोगदंड यांच्या पुढाकारातून हा कार्यक्रम दरवर्षी दुबईत घेण्यात येतो. यावर्षी हा सोहळा ६ मार्च रोजी दुबई येथील पंचतारांकित मीडिया रोटाना या हॉटेलमध्ये आयोजित करण्यात आला होता. यामध्ये महाराष्ट्रातील जवळपास ३० जणांचा सन्मान करण्यात आला. या वर्षी हा अवॉर्ड सोहळा ए.एन.पी. ग्रुप्स, एस.के.ग्रुप्स, पुणे व स्वयंदीप फाऊंडेशन यांच्या संयुक्त विद्यमाने करण्यात आला.
या कार्यक्रमाला प्रमुख पाहुणे म्हणून एस.के. ग्रुप्सचे प्रमुख सचिन चव्हाण, दुबई येथील ड्रीम डिझाईनचे संचालक कार्तिक दुर्वासुला, मिनाझ फईम, यशदा पुणे येथील अधिकारी डॉ.बबन जोगदंड, सेवानिवृत्त सहाय्यक पोलीस आयुक्त महेंद्र रोकडे व राहुल भातकुले हे उपस्थित होते. यांच्या हस्ते मान्यवरांना पुरस्कार देऊन सन्मानित करण्यात आले. दुबई येथे हा मानाचा पुरस्कार मिळाल्याबद्दल श्री व्यंकटेश चौधरी सर्व स्तरातून अभिनंदन होत आहे.
( नांदेडच्या शिक्षणाधिकारी डॉ. सविता बिरगे यांनिही कार्यालयात श्री. चौधरी यांचे अभिनंदन केले. )
आपल्या प्रतिक्रिया आमच्यासाठी महत्त्वपूर्ण आहेत .