⚫ श्रावण
आला श्रावण
हरपले भान
गीत गुणगान
मन पावन
हसरी धरा
हिरवी पालवी
घरटी डोलवी
आनंदी चरा
पाऊसधारा
नद्या खळखळ
पाने सळसळ
उनाड वारा
ही वसुंधरा
मनास भावते
रूपडे दावते
सृष्टी सुंदरा
पवित्र मास
धार्मिक जागृती
आणते प्रकृती
मनी उल्हास
- अर्चना गरूड / किनवट
__________________________________
⚫ " शेत "
शेत शिवारी
देह झीजवितो
मळे फुलवितो
बळी कैवारी
काळी ही आई
पोशिंदा विश्वाची
जोडी वृषभाची
श्रमात न्हाई
दातृत्वभाव
उदार हृदय
जीव भाग्योदय
वल्हवी नाव
सौंदर्य रूप
सर्वांना हर्षिते
वर्षा वर्षविते
सुखावे खूप
देई आधार
पशुपक्ष्या चारा
पोसते पसारा
सृष्टी उद्धार
व्हा संरक्षक
सेंद्रिय वापर
करूया जागर
खते तक्षक
कृषी अस्तित्व
फुलेल संसार
अन्यथा संहार
जीव अस्तित्व
- अर्चना गरूड / किनवट
_________________________________
⚫ रानफुले
तप्त कडक उन्हात
फुले रानी रानफूल
रूप साजिरे गोजिरे
तन मना पाडी भूल
रंग केशर पिऊन
उभा निष्पर्ण पळस
ऊर्मी चैतन्य संचारी
दूर घालवी आळस
डोंगराळ माथ्यावर
काटेशेवरी फुलली
मधु पराग पिऊन
पक्षी फांदीत झुलली
धवल वर्णी कदंब
ठेवी खिळून नजर
गोलाकार रम्य पुष्प
करी काळजात घर
पिवळाजर्द बहावा
देई मनस्वी उमंग
नानाविध रानफुले
फुलवती अंतरंग
देई निसर्ग संदेश
जगा फुलून आनंदी
अंगी बाणून संयम
वृत्ती ठेवावी स्वच्छंदी
- अर्चना गरुड / किनवट
________________________________
⚫ आई
आई असते
मांगल्याचे प्रतिक
मन रांगोळीतील
शुभ स्वास्तिक
आई असते
वृंदावनातील तुळस
सहवासात गाठतो
प्रगतीचा कळस
आई असते
शितल सावली
प्रेमगारवा देणारी
एकमेव माऊली
आई असते
मायेची घागर
प्रेमनीरा प्राशता
सुखावते आगर
आई असते
भावनेचे नाव
घेते काळजाचा
अचूक ठाव
आई असते
लेकराची हिंमत
शौर्य - धैर्याची
अमूल्य किंमत
आई असते
प्रितीचा झरा
अखंड पिऊन
साठवावे उरा
आई असते
देहातला प्राण
बाळहिता करी
आयुष्याचे रान
आई असते
वात्सल्याच्या राशी
दूरवर असूनही
चित्त पिलापाशी
- अर्चना गरूड / किनवट
__________________________________
। अथांग सागर ।
आवडतो मज खूप
निळा अथांग सागर
भरती ओहोटी रूपी
सुख दुःखाचे आगर
येती जीवनी प्रत्यय
क्षणिक सुखाच्या लाटा
खवळता हा सागर
येई अंगावर काटा
सागरी गर्भात वास
रम्य मौलिक खजिना
शुभ्र तेज मोती माळा
आवडता स्त्री दागिना
कोळी बांधवाचा प्रिय
नारळी पौर्णिमा सण
करी अंतर्मनी घर
प्रातः सूर्योदय क्षण
नमो सागरी देवता
करावे विशाल मन
कृपा दृष्टी सृष्टीवर
व्हावे सुखद जीवन
- श्रीमती अर्चना दिगंबर गरूड
'संस्कृती निवास' Svm कॉलनी, ओम शांती सेंटर जवळ, किनवट,ता.किनवट, जि.नांदेड
∆∆∆∆∆∆∆∆∆∆∆∆∆∆∆∆∆∆∆∆∆∆
आपल्या प्रतिक्रिया आमच्यासाठी महत्त्वपूर्ण आहेत .